馬鞍山勸退示威者,談判專家林景昇親解心情真相

發表示2019-08-23 18:11
囍雨
近期因為警民關係緊張,囍雨有時甚至覺得,警察同示威者、暴徒之間,好似去到一種「非你死、即我亡」嘅感覺,尤其係當示威者暴力不斷升級,呢種令人擔憂嘅感覺就更明顯。近日,網上流傳一條片段,喺8月5日示威者包圍馬鞍山警署期間,一名總督察用溫柔嘅聲音,叫啲年輕人諗吓後果,唔好因為「強出頭」而失去光陰;呢段被喻為「激光中深情對話——警察視角」嘅影片引來極大迴響,「對話」中嘅主角林景昇總督察日前接受《港人講地》訪問,直言香港係大家嘅屋企,如果傷害咗其他人,將來後悔可能太遲。
 
如果要評論林景昇喺訪問時嘅態度、語氣,囍雨認為用「情真意切」嚟形容就最恰當,例如佢講到年輕人嘅時候,就表明大家如果冷靜落嚟諗一諗做過嘅嘢值唔值得,第時先後悔會唔會太遲,佢最唔想幾年過後有任何青年因為之前「一念之差,行差踏錯」;而無論對方係咩人,其實大家都係香港一分子,如果往後諗返件事,可能覺得無必要傷害對方嘅時候,果時先嚟後悔,可能已經太遲。
 
若負上刑責 家人又何?
 
囍雨認為,林景昇呢番說話,點出咗一個好簡明,但唔少人尤其係年輕人都忽略咗嘅重點,就係今日一班年輕人,好多都好慷慨激昂,要企出嚟為社會、自己爭取唔同嘅訴求,但如果佢哋用上嘅手段係違法甚至係有暴力嘅,咁傷害到其他人固然唔好,而傷害到其他人嘅同時,自己亦可能負上刑責,引用返林景昇喺「激光中深情對話」嘅講法,就係「俾自己一個機會,諗諗養育你嘅父母,我請你依家離開,睇睇自己手機通訊錄有邊啲人,未來5年你係咪真係想同呢啲人失去聯絡?」
 
快回家 喝碗湯
 
喺林景昇嘅訪問入面,有一個囍雨發現其他傳媒無乜報道過嘅位,就係林景昇話自己最近聽咗一首關於「返屋企飲湯」嘅歌,話佢聽完有啲想喊,表示大家忙碌完一日,其實都想返屋企飲碗湯,有屋企人嘅關懷唔係必然,因為大家都唔知道有一日邊個會「無端離開」。睇到呢個位,囍雨就喺度補充一句,如果有好多年輕人仲繼續想抗爭、想衝,會唔會諗下,有家人喺屋企等緊你,等緊你返去飲「一碗湯」?如果你有事,咁喺屋企等緊你嘅家人,又會點呢? 

以下視頻中的林sir以磁性聲缐和循循善誘的方式,勸告馬鞍山示威者離開。

以下視頻是深水埗欽州街警民對話